சொந்த தயாரிப்பால் பாலிவுட்டில் ரீ-என்ட்ரியாகும் ப்ரீத்தி ஜிந்தா

பாலிவுட்டின் கனவுக் கன்னியாக வலம்வந்த ப்ரீத்தி ஜிந்தா ஐ.பி.எல். கிரிக்கெட் போட்டிகளில் கவனம் செலுத்தியதால் படங்களில் நடிப்பதற்கு ஆர்வம் காட்டாமல் இருந்து வந்தார். இதனால் இவரை பாலிவுட் திரையுலகமும் கைகழுவியது.

ஐ.பி.எல். போட்டிகளில் ஏற்பட்ட ஏமாற்றத்தையடுத்து, நடிப்பில் ஆர்வம் காட்டிய இவர், வாய்ப்புக்காக காத்திருந்து, காத்திருந்து நொந்துபோக, சொந்தமாக படத்தை தயாரித்து நடிக்க முடிவு செய்துள்ளார்.

‘இஸ்க் இன் பாரீஸ்’ என்ற படத்தை தயாரித்து நடிக்கவும் போகிறார். முழுக்க முழுக்க பிரான்சில் நடக்கும் கதையாம். பிரேம் ராஜா என்பவர் இயக்குகிறார். சல்மான் கான் சிறப்புத் தோற்றத்தில் இப்படத்தில் நடிக்கிறாராம்.

காதலுக்கு நேர்மாறான மனப்பான்மை உடைய ஒரு இளைஞனும், இளைஞியும் எதிர்பாராத விதமாக காதலில் விழுவதே படத்தின் கதையாம்.