பிப்-2-ம் தேதி டி.டி.எச்-ல் விஸ்வரூபம்: கமல் அறிவிப்பு!!

 தியேட்டரில் வெளியான ஒருவாரத்திற்கு பின்னர் பிப்-2.,ம் தேதி டி.டி.எச்.-இல் விஸ்வரூபம் படம் வெளியாகும் என கமல்ஹாசன் அறிவித்துள்ளார். விஸ்வரூபம் படத்தை டிடிஎச்சில் முதலிலும், பின்னர் தியேட்டரிலும் வெளியிடப்படும் என்ற உறுதியான நிலைப்பாட்டை கொண்டிருந்த கமல், அதன்பிறகு தியேட்டர் உரிமையாளர்களுடன் நடத்திய பேச்சுவார்த்தையில் ஒரு சுமூக முடிவு ஏற்பட்டதை தொடர்ந்து இரண்டையும் ஒரே நாளில் வெளியிட இருப்பதாக சொன்னார். இதற்கு தியேட்டர், டிடிஎச் இரண்டு தரப்பிலுமே பலத்த எதிர்ப்பு கிளம்ப ஜன., 25ம் தேதி தமிழகம் முழுக்க சுமார் 500 தியேட்டரில் விஸ்வரூபம் படம் வெளியிடப்படும் என்று அறிவித்தார். தியேட்டர் உரிமையாளர்களும் கமலுக்கு பக்கபலமாக இருந்து அவருக்‌கு வெற்றியை தேடி தருவோம் என்று குரல் கொடுத்தனர். அதேசமயம் டிடிஎச்சில் வெளியிடுவது பற்றி எந்த அறிவிப்பையும் வெளியிடாமல் இருந்து வந்தார் கமல்.

இந்நிலையில் விஸ்வரூபம் படம் பிப்ரவரி 2ம் தேதி டி.டி.எச்.-இல் வெளியிட இருப்பதாக கமல் அறிவித்துள்ளார். இதுகுறித்து அவர் வெளியிட்டுள்ள அறிக்கையில், தியேட்டர்களில் ஜனவரி 25ம் தேதி விஸ்வரூபம் படம் வெளியாகிறது. அதனைத்தொடர்ந்து ஒருவாரம் கழித்து பிப்ரவரி 2ம் தேதி டி.டி.எச்-இல் வெளியாகிறது என்று கூறியுள்ளார். மேலும் டி.டி.எச்.-இல் வெளியாகும் நிறுவனம் எது என்று பின்னர் அறிவிப்பதாக கமல் தெரிவித்துள்ளார்.

தியேட்டரில் வெளியான ஒரு வாரத்திற்கு பின்னர் டி.டி.எச்.-ல் ரிலீஸ் மற்றும் அது எந்த நிறுவனம் என்று பின்னர் தெரிவிப்பதாக கமல் கூறியிருப்பதன் மூலம் டி.டி.எச்., உரிமையாளர்கள் மத்தியில் அதிருப்தி கிளம்பியுள்ள‌தை காட்டுகிறது. இதனால் ஏற்கனவே கமலுடம் ஒப்பந்த செய்திருந்த சில டி.டி.எச். நிறுவனங்கள் கமலுடனான ஒப்பந்தத்தை ரத்து செய்வதாகவே கருதப்படுகிறது. மேலும் சில டி.டி.எச். நிறுவனங்கள் வாடிக்கையாளர்களிடம் வாங்கிய பணத்தை திருப்பி கொடுத்து வருவதாகவும் தகவல் வெளியானது.